Կարդա և գունավորիր 1 Թե ինչու… Հեքիաթներ կենդանիների մասին : Ճուղուր Երևանցի

Սիրելի՜ ընթերցող, թե փոքրիկները և թե մեծիկները միշտ էլ սիրել են հեքիաթներ, որտեղ բարին հաղթում է չարին, իրականանում են հաճելի և գեղեցիկ ցանկություններ:
Հեքիաթների այս ժողովածուն անմասն չի մնում նշված ավանդույթներից: Նրա հերոսները նույնպես բարի ցանկություններ ունեն, որոնք իրականություն են դառնում և ցանկալի ավարտ ունենում: Սակայն այստեղ որոշ առանձնահատկություններ կան: Նախ, հեքիաթների հերոսները բացառապես կենդանիներ են, բոլորիս հայտնի թե՛ վայրի և թե՛ ընտանի, որոնք ընկնում են բարդ իրավիճակների մեջ, բայց հեքիաթներին համահունչ՝ ի վերջո ցանկալի ելքեր են ունենում: Բացի այդ, որը մեզ համար ամենակարևորն է, ցանկացել ենք հեքիաթների միջոցով փոքր-ինչ ուսուցողական տեղեկատվություն տալ մեր փոքրիկներին՝ կենդանիների վարքի, իրենց օգտակարության, կենսակերպի մասին:

Եվ պատահական չէ, որ բոլոր հեքիաթներն էլ ունեն հարցական վերնագրեր, իսկ այդ «թե ինչու»-ների շնորհիվ ցանկություն ենք ունեցել մեր փոքրիկներին ոչ միայն տեղափոխելու հեքիաթային միջավայր, այլև փոքր-ինչ ծանոթացնելու կենդանական աշխարհի իրական կյանքին: Հատկանշական է նաև այն, որ հեքիաթների նկարազարդումը կատարել է իմ դուստրը՝ Սոֆի Ճուղուրյանը, որին ես մանուկ հասակում պատմել եմ այս հեքիաթները, իսկ հիմա, ժողովածուի տեսքով, նվիրում եմ իր տասնամյակին: