Ինչպես ընթերցել գրականություն պրոֆեսորի պես ։ Թոմաս Ս․ Ֆոսթեր

Թոմաս Ֆոսթերի դասական ձեռնարկի՝ մանրակրկիտ վերանայված և թարմացված այս հրատարակությունը վառ ու հետաքրքիր ուղեցույց է գրականության ու գեղարվեստականության հիմքերի վերաբերյալ, այդ թվում՝ սիմվոլների, թեմաների և կոնտեքստի։ Այն ցույց է տալիս, թե ինչպես ամենօրյա ընթերցանությունը դարձնել ավելի հաճելի և օգտակար։ Թեպետ գրքերը հիմնականում հաճույքով ընթերցվում են սյուժեի համար, դրանց տեքստերում հաճախ ավելի խոր գրական իմաստ է ամփոփվում։ «Ինչպես ընթերցել գրականություն պրոֆեսորի պես» գիրքն օգնում է մեզ բացահայտելու այդ թաքնված ճշմարտությունները՝ գրականությանը նայելով գերպրոֆեսիոնալ ընթերցողի՝ համալսարանական դասախոսի աչքերով։ Ի՞նչ է նշանակում, երբ գրական հերոսը միայնակ քայլում է փոշոտ արահետով։ Երբ խմիչք է փոխանցում իր ուղեկցին։ Երբ մինչև ոսկորները թրջվում է հանկարծահաս հորդ անձրևից։ Հիմնական թեմաներից մինչև գրական մոդելներ, շարադրանքի մեթոդներ և կաղապարներ․ Թոմաս Ֆոսթերը տալիս է գրականության լայն պատկերը՝ մի աշխարհի, որտեղ ճանապարհը տանում է փնտրտուքների, համատեղ հացկերույթը կարող է նշանակել ընդհանրություն, և անձրևը՝ լինել մաքրող կամ կործանիչ, այլ ոչ պարզապես ջրային ցնցուղ։ Այս լրամշակված հրատարակությունն ընդգրկում է նոր գլուխներ, ներածություն ու վերջաբան և պարունակում է դրույթներ, որոնք Ֆոսթերը զարգացրել է վերջին տասնամյակի ընթացքում։